అశ్రువొక్కటి చెక్కిలిపై… సయ్యద్ షాదుల్లా కవిత

సయ్యద్ షాదుల్లా

ఊపిరి అందడం లేదు
గట్టున పడేసిన చేపలా
కొడిగట్టిన దీపంలా
కొట్టుకుంటున్నాయి ఊపిరి తిత్తులు గిలగిలా
నా శ్వాసనిశ్వాసలతో మృత్యువు దాగుడు మూతలాడుతున్నట్టుంది
ఎందుకో మృత్యువే గెలుస్తుందని నా అలసిన గుండె బేలగా చెబుతుంది
కరోన మృత్యుశయ్య ఇంత కఠినంగా ఉందేమిటి ?
చావనివ్వదు బ్రతుకునివ్వదు,
చావు ఇంత భయానకంగా ఉంటుందా?
కనురెప్పలు భారంగా మూతపడుతూ జ్ఞాపకాలదొంతరలు తెరిచాయి గతంలోకి వెళ్ళాయి.

లాక్ డౌన్ తో పట్టణమంత నిశ్శబ్దంగా
తుపానుకు ముందు ప్రశాంతంలా ఉంది.
శాంతివైద్యపారిశుధ్యం మన రక్షణ కవచంలా
మనకు లక్ష్మణ రేఖలా నిలిచి ఉండగా
నిశ్శబ్దాన్ని ఛేదిస్తూ ముందుకు వెళుతున్నాను
రక్షణ వలయం దాటుతూ సుడిగాలితో పోటీ పడుతూ, మృత్యుకుహరంలోకి
నా జీవితం కోసం తమ జీవితాన్ని పణంగా పెట్టిన పొలీసుల ఆగని పరుగు నా వెనక
నా కప్పుడు తెలీదు నేను కనిపించని మృత్యువుతో కలవడానికి తిరిగి రాని లోకాలకు వెలుతున్నానని,

కన్నీటి పొరల మధ్య లీలగా కనిపిస్తుంది నా అందాలసుందర హర్మ్యం
కోటి ఆశలతో, ఏడు జన్మలు నాతోనే ఉంటానని
ఏడడుగుల బంధంతో నను పెనవేసి వెచ్చని కౌగిలిలో బంధించిన నా భార్య అడుగుతుందిపగిలిన గుండెను నలిగిన గొంతుతో కలిపి ఎక్కడికెలుతున్నావని?

నా చెక్కిళ్ళపై ఇంకాఆరని నా రెండేళ్ళకూతురు లేలేత గులాబీపెదాల ముద్రలు
భీత హరిణిలా ఏదోతెలియని భయంతో నన్ను చూసిన ఆ కళ్ళు

ఒంటరి జీవితంతో వేసారి జంటకోసం ఎదురుచూస్తున్న నా సోదరి కళ్ళలో
ఇకనేనింతేనా అన్న నైరాశ్యం ననునిలువెల్లా దహిస్తున్నట్లుంది.

చరమాంకంలో చేతి కర్రలా ఉండాల్సిన కొడుకు
కరోన మృత్యు కౌగిలిలో విలవిలలాడడం జీవఛ్చవాల్లా చావలేక బతుకుతున్న
నా ముసలి తల్లితండ్రులకు తీరని శరాఘాతం

నా అనాధ శవ దహనసంస్కారం కన్నులకు కట్టినట్టుగా కనిపిస్తుంది
చితి మంటల చిటపటలు
అనాధల హాహా కారాలు

నేను చేసిన తప్పుకు ఎన్ని జీవితాలకు చిద్రాలు పడ్డాయి?
నా శ్వాస ఆగినట్లనిపిస్తుంది !
దూరంగా నర్సులు నా వైపుకు ఆత్రంగా వస్తున్నట్లుంది!!
నా చివరి అశ్రువొక్కటి కరోనాను శపిస్తూ నా చెక్కిలిపై ఘనీభవించింది !!!
నా కలం ఆగింది !!!!

కరోనా మహమ్మారి మూడో వేవ్ లో ఉన్నాం.
ప్రస్తుతం కాస్త వెసులుబాటు ఉన్నట్టు అనిపించినా ముందేమి జరగనున్నదో ఊహించలేని స్థితి. నిస్సహాయ స్థితి. జాగ్రత్తగా ఉండాలన్నహెచ్చరికకు దర్పణం ఈ కవిత.

సయ్యద్ షాదుల్లా, 548,
CSK గ్రీన్ విల్లాస్, షాద్ నగర్ – 509216.
మొబైల్ : 9121001918.