తన్మయత్వం తెలుపు – మారసాని విజయ్ బాబు ఈ వారం కథనం

చిత్రకారుడి సృష్టి అపూర్వం. అనంతం…

తనలోని వూహలను, కోరికలను, స్వప్నాలను, చిత్రాలను, ప్రతిబింబాలను, ఆవేదనను, ఆలోచనను, ఆనందాన్ని, చైతన్యాన్ని కళాత్మకంగా వ్యక్తం చేసే నేర్పరి అతడు. అటువంటి సృజనాత్మకమైన వ్యక్తితో పరిచయం నా వూహకైనా అందకుండా జరిగింది.

అది నా అదృష్టం.

జీవితంలో ఆపాదమస్తకం కుదిపేసే అపురూప ఆనంద క్షణాల గురించిన అనుభవగాథా సంపుటిలో ఇది ఐదో కథనం.

బావిలోని కప్ప చెరువులో పడ్డట్టు విస్తారమైన ప్రపంచంలోకి నువ్వు వచ్చేశావు. మునుపటిలా కాదు. యిక్కడ పోటీ పడాలంటే నువ్వు మరింత నేర్చుకోవాల్సిందే.

జీవితం గమ్మత్తయింది. యెవర్ని యెప్పుడు యెలా కలుపుతుందో తెలియదు, అనుకోకుండా పరిచయం అయిన హేమాద్రి మాస్టారు నా జీవిత గతినే మార్చేస్తారని నేనపుడు యెంతమాత్రం గుర్తించలేదు.

నెల తర్వాత తెలిసిందేమిటంటే…ఆల్ యిండియా ఆర్ట్ యెగ్జిబిషన్లో నా పెయింటింగ్ మొదటి బహుమతిని వశం చేసుకుందని. యిక నా ఆనందానికి అవధులు లేవు.